Wednesday, February 16, 2011

منهم أكثر وطنية ....


الى كل من شكك فى وطنية كل من "طالب بتوقف الثورة" ... أوجه كلامى
الى كل من أهان من "امتنع عن المشاركة فى الثورة .. فعليا" .. أوجه كلامى
الى كل من وجه كلمة مهينة لمن "طالب بتوقف الثورة .. ثم فرح بانجازاتها" ... أوجه كلامى


ملحوظة ... منهم أكثر وطنية

الثورة مش بس ان الواحد ينزل المظاهرات بنفسه ويقول شعارات
لكن 
كل اللى فضل فى البيت فى اللجان الشعبية عشان يحمى أهله وبيته .. شارك فى الثورة
كل من امتنع فى يوم من الأيام عن دفع رشوة .. أو اعترض على ظلم البلد .. شارك فى الثورة
كل ست بسيطة نزلت كوباية شاى للجيش أو الشباب اللى كان بينضف الشارع .. شاركت فى الثورة
كل اللى طلب ان الثورة تقف .. مكتفيا بالمكاسب اللى حققها الشباب .. خوفا على مصلحة البلد ومنعا لإراقة مزيد من الدماء .. شارك فى الثورة
كل اللى نزل شغله .. ورفض ان أحوال الدولة تقف ... لخوفه عليها .. شارك فى الثورة
كل اللى حيبدأ من دلوقتى انه ينضف بلده ويرقيها يعتبر .. شارك فى الثورة
بل كل من رفع قلبه بالصلاة والدعاء من أجل أمن واستقرار مصر .. من الجوامع والكنائس .. أو المواطنين فى منازلهم .. شارك فى
الثورة



هل بعد كل دة .. الناس دى مش من حقها تفرح ؟
هل بعد كل دة .. الناس دى لو فرحت . تعتبر بتتمحك فى الثورة؟

سؤال .. مين كان بيحب الظلم والفساد اللى البلد كانت فيه؟ مين كان عايز الريس يرشح نفسه تانى؟؟؟؟؟؟ مين مزعلش على دم الشهداء اللى راح ؟؟؟؟
مين محسش بالإهانة لما شاف الملايين اللى اتنهبت والبلطجية اللى انطلقت والحكومة اللى انفجرت فى الناس؟؟؟؟
لكن فيه حاجة اسمها ان كل واحد بيعبر عن رأيه بطريقته الشخصية ..  
.. واللى هو شايفها صح .. وعلى الآخرين تقبلها
وميعتبروهومش خاينين
ولا أغبية
ولا ناس متستاهلش الحرية وعمرها ما حتطلع قدام
و سورى فى اللفظ ... ميلقحوش عليهم كلام

من بعض الأراء اللى سمعتها انهاردة ... ان فيه ناس كان نفسها الريس يقعد لآخر فترة رياسته .. عشان يبقوا ضامنين الفترة اللى جاية شكلها حيبقى عامل ازاى .. ولخوفهم من تطبيق الأحكام العرفية .. وبعد كدة فعلا التصليح ييجى .. ودة رأى يجب احترامه

من بعض الآراء اللى سمعتها برضه .. ان  الريس لازم "يمشى .. بس ميتشتمشى " وأنا قلبا وقالبا مع الرأى دة .. العالم امتدح الثورة دى عشان كانت سلمية بدون تخريب ... طيب لو عرفوا كمان ان الثورة على الفساد وليس على شخص الرئيس!! .. حيكون نظرتهم ايه ؟؟ حيكون احترامنا لنفسنا أد ايه لما نفتكر اننا فى يوم قررنا ان الرئيس يمشى لكن بدون اهانة ؟؟
بتخيل دلوقتى الجوامع والكنايس بتدعى للرئيس السابق بالشفاء .. ياااه ... ايه السماحة والروعة دى .. حتى لو الراجل غلط .. منردش الغلط

 من بعض الأراء اللى سمعتها ان الريس لازم يتقال اللى ليه واللى عليه .. ظلم وفساد وقهر آه .. لكن 30 سنة بدون حرب لازم تتقال
.. اهتم بالسياسة الخارجية حاجة كويسة .. بس أهمل الداخلية لازم تتقال
كله لازم يتقال


لكم أن تقبلوا أو ترفضوا هذه الآراء .. لكن عليكم احترامها .. وعدم مهاجمة أى حد يكتبها .. والعكس صحيح .. مش من حق أى حد انه يهاجم مؤيد للثورة أو مؤيد للمظاهرات .. أو يقولله انت بتولعها .. دى حرية الرأى 


أعجبت بوائل غنيم اليوم .. لما قال انه يعترف بأنه عمل غلطات كتير .. و أنا كنت من المختلفين معاه فى بعض الأراء فعلا .. لكن احترمته جدا لما اعترف بده .. ولأنه شخص عقلانى متفتح .. تقبل الرأى الآخر .. ومتمسكش برأيه لوحده
, وأنا متأكدة انه مش شايف كل الناس اللى كان نفسها الثورة تقف ناس متخلفة بل على العكس
هو عارف .. ان عشان دولة ترتقى .. لازم يكون فيها حرية رأى .. طيب لو ماحترمناش رأى بعض .. بيننا وبين بعض .. من دلوقتى ..يبقى حالنا حيكون ازاى وحنقوم دولة ازاى ؟


وأختم كلامى بجزء كتبه الشاعر بشرى فتحى عجبان :
فأنا حزين يافندم لأنكم خسرتم كرم مصر وشعبها وهذا كما تعلم سيادتك بمليارات الدنيا كلها 
حفظ الله بلادي .. التي علمت عنها أنها أغلى من روحي 
حفظ الله بلادي .. التي أطعمتني وربتني وعلمتني .. 
وعاش أبناءها المخلصون 
وسامح الله سيادتكم يافندم

مبروك لشباب مصر اللى صنعوا التاريخ .. وصنعوا الحرية ..
فخورة اننى عشت الأيام دى .. وفخورة ان جيلنا أثبت أنه قادر على تحقيق الحرية ...
عاشت مصر بلدى حرة مستقلة


Wednesday, January 27, 2010

صلاة جميلة جدا



أيها الأب الحبيب الذي ترتاح لك القلوب و تأتى إليك كل النفوس
أنى آتى إليك بكل همومي و كل ضيقاتى


مستندا على وعدك الصادق الأمين ( تعالوا إلى يا جميع المتعبين و الثقيلى الأحمال و أنا أريحكم ) .
يارب يسوع لا يوجد غيرك في هذا الكون كله يستطيع أن يقدم لي العون و يرفع عنى الهم غيرك .
أنت يارب الذي فديتني بدمك و فعلت أعظم عمل للإنسان تستطيع أيضا أن ترفع عن صدري همي و تخفف عن كاهلي حملي .
و أنى أثق فى وعدك يارب الذى يعطى النفس رجاء ( للرب السيد عند الموت مخارج) .
و أنت يارب لا يستحيل عليك شئ .
- فأنت الذى أقمت لعازر من الموت بعد ما أنتن و مضى عليه فى القبر 4 أيام إذن يارب تستطيع أن تقيمنى أنا من الموت و الآم الخطية المبرحة .
- أنت يارب الذى انقذت دانيال من جب الاسود تستطيع أن تنقذنى من المخاوف و المخاطر التى تعترض حياتى .
- انت يارب الذى أنقذت الثلاثة فتية من أتون النار تستطيع أن تنقذنى من أتون هذا العالم الملئ بالظلمة و الغش و الخداع .


ربى ها أنا بين يديك أسلمك أمرى و حياتى كلها .
لا تخذلنى يارب و أريدك أن تصنع معى آية مصاف القديسين و الشهداء الابرار ارحمنى يارب و اغفر خطاياى و فرح قلبى



أميـــــــــــ+ــــــــــــــن

Tuesday, January 26, 2010

يونان النبى


قال مار اسحق السريانى : التوبة هى السفينة والخوف ربانها والحب هو الميناء الالهى
والأنجيل قال : رجال نينوى سيقومون فى الدين مع هذا الجيل ويدينونه لأنهم تابوا بمناداة يونان (لو 32:11)
فلازم على كل واحد فينا انه يقرب من يونان ومن أهل نينوى ويشوف .. ايه اللى أهل الناس دى انهم يقفوا يوم الدين و يدينونا
وايه عظمة يونان النبى .. اللى لما قاللهم كلمتين صغيرين خلاهم يتوبوا ويصلوا و يصوموا و يسيبوا الخطية
وليه ربنا فضل ورا يونان ومستخدمش حد تانى غيره ؟؟؟؟؟

طلعنا خلوة فى صوم يونان 2009 وكانت رائعة جدا وكان درس الكتاب عن يونان النبى
وبما اننا الأيام دى فى صوم يونان .. فقررت اننى أكتبها
------------------------------------------------


آية يونان النبى رمز لموت وقيامة المسيح. وموت وقيامة المسيح هما المسيحية كلها, لأن لو المسيح مكانش قام كان يبقى ايماننا باطل
13فَإِنْ لَمْ تَكُنْ قِيَامَةُ أَمْوَاتٍ فَلاَ يَكُونُ الْمَسِيحُ قَدْ قَامَ! 14وَإِنْ لَمْ يَكُنِ الْمَسِيحُ قَدْ قَامَ، فَبَاطِلَةٌ كِرَازَتُنَا وَبَاطِلٌ أَيْضًا إِيمَانُكُمْ،
يبقى أكيد لو روحنا ليونان ... حنكتشف المسيح ............


1-لانه هكذا أحب الله العالم ... (يو 16:3)
فقد كشف هذا السفر عن محبة الله واشتياقه لخلاص الجميع بغض النظر عن كونهم يهودا أو أمم.
- فأبرز جوانب طيبة فى النوتية الأمميين
5فَخَافَ الْمَلاَّحُونَ وَصَرَخُوا كُلُّ وَاحِدٍ إِلَى إِلهِهِ، وَطَرَحُوا الأَمْتِعَةَ الَّتِي فِي السَّفِينَةِ إِلَى الْبَحْرِ لِيُخَفِّفُوا عَنْهُمْ. وَأَمَّا يُونَانُ فَكَانَ قَدْ نَزَلَ إِلَى جَوْفِ السَّفِينَةِ وَاضْطَجَعَ وَنَامَ نَوْمًا ثَقِيلاً. (يونان 5:1)

الجانب الطيب : خافوا - صلوا - طرحوا الأمتعة
بدأوا بالصلاة قبل كل حاجة .. الطبيعى ان االناس دى أول حاجة يعملوها انهم يخففوا السفينة ويرموا الأمتعة .. لكن هم صلوا الأول
يعنى كان عندهم استعداد للصلاة قبل أى عمل.



-واستعدادا فائقا للملك الوثنى وكل شعبه لقبول محبة الله الفائقة لكل البشرية.
5فَآمَنَ أَهْلُ نِينَوَى بِاللهِ وَنَادَوْا بِصَوْمٍ وَلَبِسُوا مُسُوحًا مِنْ كَبِيرِهِمْ إِلَى صَغِيرِهِمْ. 6وَبَلَغَ الأَمْرُ مَلِكَ نِينَوَى، فَقَامَ عَنْ كُرْسِيِّهِ وَخَلَعَ رِدَاءَهُ عَنْهُ، وَتَغَطَّى بِمِسْحٍ وَجَلَسَ عَلَى الرَّمَادِ. (يونان 5,6:3)

الجانب الطيب :أهل نينوى أول ما سمعوا من يونان قاموا على طول ونهضوا للتغيير والتوبة .. حتى الملك أول ما سمع نزل عن كرسيه ولبس المسوح. يعنى ربنا دور عليهم من خلال محبته وهم استجابوا للمحبة.


ما هو السبب الرئيسى فى هروب يونان من وجه الرب؟وماذا كانت النتيجة؟وماذا نتعلم من ذلك؟ من خلال الشواهد دى


رومية 9
25 كَمَا يَقُولُ فِي هُوشَعَ أَيْضًا:«سَأَدْعُو الَّذِي لَيْسَ شَعْبِي شَعْبِي، وَالَّتِي لَيْسَتْ مَحْبُوبَةً مَحْبُوبَةً. 26 وَيَكُونُ فِي الْمَوْضِعِ الَّذِي قِيلَ لَهُمْ فِيهِ: لَسْتُمْ شَعْبِي، أَنَّهُ هُنَاكَ يُدْعَوْنَ أَبْنَاءَ اللهِ الْحَيِّ».

نفهم من هنا ان ربنا معندوش تمييز .. وان الكويس ربنا حيقبله والوحش ربنا حيسيبه :) "
الَّتِي لَيْسَتْ مَحْبُوبَةً مَحْبُوبَةً" ونينوى مش من شعب ربنا.

رومية 10
أَيُّهَا الإِخْوَةُ، إِنَّ مَسَرَّةَ قَلْبِي وَطَلِْبَتِي إِلَى اللهِ لأَجْلِ إِسْرَائِيلَ هِيَ لِلْخَلاَصِ. 2 لأَنِّي أَشْهَدُ لَهُمْ أَنَّ لَهُمْ غَيْرَةً ِللهِ، وَلكِنْ لَيْسَ حَسَبَ الْمَعْرِفَةِ. 3 لأَنَّهُمْ إِذْ كَانُوا يَجْهَلُونَ بِرَّ اللهِ، وَيَطْلُبُونَ أَنْ يُثْبِتُوا بِرَّ أَنْفُسِهِمْ لَمْ يُخْضَعُوا لِبِرِّ اللهِ.

بولس الرسول بيقول ان رفض اسرائيل لربنا موضوع شاغله جدا وتاعبه جدا .. فبيقول ان طلبته للخلاص لأنه مش قادر يقبل كدة.بيقول هم فعلا عندهم غيرة بس غيرة مش صح..هى غيرة عشان يحققوا ذاتهم مش عشان يحققوا بر الله.

رومية 11
فَأَقُولُ: أَلَعَلَّهُمْ عَثَرُوا لِكَيْ يَسْقُطُوا؟ حَاشَا! بَلْ بِزَلَّتِهِمْ صَارَ الْخَلاَصُ لِلأُمَمِ لإِغَارَتِهِمْ.

بيقول ان شعب اسرائيل مترفضش رفض تام . لكن ربنا بيعاملهم كأولاد ليه.
زى واحد لما يسيب ابنه ويعامل طفل تانى أحسن ... تلاقى الولد يغير ويرجع لباباه , برده ربنا عمل كدة
وفى الأخر هم كمان يرجعوا وتكون رعية واحدة

نفهم من كدة ايه؟
يونان مراحش لأهل نينوى لأن فى فكراليهودى ان لما ربنا يقبل الأمم يبقى معناها انه حيرفض اسرائيل
ويونان كان شايف ان دة حيبقى على حساب اليهود .. فقال انا مضرش شعبى وناسى .. تيجى من أى حد تانى غيرى :)
دة كان فكر يونان

النتيجة : ان ربنا دخله فى ضيقة وكمان ربنا فضل وراه .. يونان كان فاكر انه لما يهرب ربنا حيسيبه وحيشوف حد تانى. لكن ربنا فضل وراه. ودخله فى ضيقة

الأستفادة: اننا نعرف ان كلمة ربنا حتمشى مهما حصل "
إِنْ صَعِدْتُ إِلَى السَّمَاوَاتِ فَأَنْتَ هُنَاكَ، وَإِنْ فَرَشْتُ فِي الْهَاوِيَةِ فَهَا أَنْتَ. " الأفضل اننا نرجع لربنا ونصلح من نفسنا بدل ما نعاند ونهرب زى ما يونان عمل .

**************************************************
2- (لوقا 9:20-19) مثل الكرامين الأردياء ينطبق على الأمة اليهودية عندما تتصرف من منطلق غياب الله - سافر زمانا طويلا - (مت 7,8,9:15)
يَا مُرَاؤُونَ! حَسَنًا تَنَبَّأَ عَنْكُمْ إِشَعْيَاءُ قَائِلاً:

8 يَقْتَرِبُ إِلَيَّ هذَا الشَّعْبُ بِفَمِهِ، وَيُكْرِمُني بِشَفَتَيْهِ، وَأَمَّا قَلْبُهُ فَمُبْتَعِدٌ عَنِّي بَعِيدًا. 9 وَبَاطِلاً يَعْبُدُونَني وَهُمْ يُعَلِّمُونَ تَعَالِيمَ هِيَ وَصَايَا النَّاسِ».

فبعدما أعطاها كل الفرص ينزع عنها الكرم ليعطيه لآخرين.

هل هذا المثل يفيد فى فهم ماذا كان يفكر فيه يونان قبل الهرب؟

نفهم من المثل ان : غياب ربنا = سافر زمانا طويلا, وفى الوقت = وقت الثمر, ارسل ثالثا === منتهى طيبة ربنا
لو تخيلنا المثل مع بعض , الواحد عنده غيط عنب وشغّل ناس ووقت الثمر بعت واحد يمثله ورجعله مجلود ومتهان !!
اى واحد يعتبر دى اهانة شخصية موجهة ليه. لكن ربنا بعت مرة واتنين وتلاتة....دى طول أناة ربنا وحنان ربنا ... دة ربنا

فربنا عمل كدة مع الأمة اليهودية.
كون ان ربنا اخد الخطوة دى ونزع الكرم من الكرامين دة معناه انه بعد طول بال وطول أناة عمل كدة.
فى الشاهد عدد 16: يهلك=يتحطوا فى الجحيم للأبد , عدد 19: لأنهم عرفوا انه قال المثل عليهم
من هنا عرفنا ان المثل ينطبق على الأمة اليهودية.

هل الكلام دة كان فى فكر يونان قبل ما يهرب؟
ايوة كان فى فكره ان ربنا حينزع من شعبه ويديه للأمم فقال نتجيش منى ... فى فكره ان استحالة ربنا يقبل الأثنين مع بعض. فلو فيه كرامين جدد يبقى القدام حيمشوا. وده اللى خلى يونان يهرب لأنه كدة كأنه بيسلم شعبه.